ਸੇਵਾ ਕੇਂਦਰਾਂ ਵਿਚ ਟਰਾਂਸਪੋਰਟ ਅਤੇ ਰੈਵਨਿਊ ਵਿਭਾਗ ਦੀਆਂ 35 ਸੇਵਾਵਾਂ ਉਪਲਬਧ: ਡਿਪਟੀ ਕਮਿਸ਼ਨਰ ਆਸ਼ਿਕਾ ਜੈਨ

ਸੇਵਾ ਕੇਂਦਰਾਂ ਵਿਚ ਟਰਾਂਸਪੋਰਟ ਅਤੇ ਰੈਵਨਿਊ ਵਿਭਾਗ ਦੀਆਂ 35 ਸੇਵਾਵਾਂ ਉਪਲਬਧ: ਡਿਪਟੀ ਕਮਿਸ਼ਨਰ ਆਸ਼ਿਕਾ ਜੈਨ

ਹੁਸ਼ਿਆਰਪੁਰ, 25 ਜੁਲਾਈ:(ਨੌਰਥ ਇੰਡੀਆ ਰਿਪੋਰਟ )ਡਿਪਟੀ ਕਮਿਸ਼ਨਰ ਆਸ਼ਿਕਾ ਜੈਨ ਨੇ ਦੱਸਿਆ ਕਿ ਪੰਜਾਬ ਸਰਕਾਰ ਵੱਲੋਂ ਆਮ ਲੋਕਾਂ ਲਈ ਸਰਕਾਰੀ ਸੇਵਾਵਾਂ ਨੂੰ ਹੋਰ ਵੀ ਵਧੀਆ ਅਤੇ ਆਸਾਨ ਬਣਾਉਣ ਦੀ ਦਿਸ਼ਾ ਵਿੱਚ ਇੱਕ ਹੋਰ ਮਹੱਤਵਪੂਰਨ ਕਦਮ ਚੁੱਕਿਆ ਗਿਆ ਹੈ। ਇਸ ਤਹਿਤ ਹੁਣ ਸੇਵਾ ਕੇਂਦਰਾਂ ਰਾਹੀਂ ਟਰਾਂਸਪੋਰਟ ਵਿਭਾਗ ਦੀਆਂ 30 ਅਤੇ ਮਾਲ ਵਿਭਾਗ (ਰੈਵਨਿਊ ਵਿਭਾਗ) ਨਾਲ ਸਬੰਧਤ 5 ਸੇਵਾਵਾਂ ਜਨਤਕ ਪੱਧਰ ‘ਤੇ ਉਪਲਬਧ ਕਰਵਾਈਆਂ ਗਈਆਂ ਹਨ। ਉਨ੍ਹਾਂ ਕਿਹਾ ਕਿ ਹੁਣ ਜ਼ਿਲ੍ਹਾ ਵਾਸੀਆਂ ਨੂੰ ਡਰਾਈਵਿੰਗ ਲਾਇਸੈਂਸ ਅਤੇ ਵਾਹਨ ਰਜਿਸਟ੍ਰੇਸ਼ਨ ਨਾਲ ਸਬੰਧਤ ਕੰਮਾਂ ਲਈ ਆਰ.ਟੀ.ਏ. ਦਫ਼ਤਰ ਦੇ ਚੱਕਰ ਨਹੀਂ ਲਗਾਉਣੇ ਪੈਣਗੇ, ਕਿਉਂਕਿ ਇਹਨਾਂ ਵਿੱਚੋਂ ਡਰਾਈਵਿੰਗ ਲਾਇਸੈਂਸ ਨਾਲ ਸਬੰਧਤ 16 ਅਤੇ ਰਜਿਸਟ੍ਰੇਸ਼ਨ ਸਰਟੀਫਿਕੇਟ (ਆਰ.ਸੀ.) ਨਾਲ ਸਬੰਧਤ 14 ਸੇਵਾਵਾਂ ਸਿੱਧਾ ਸੇਵਾ ਕੇਂਦਰਾਂ ‘ਚ ਹੀ ਉਪਲਬਧ ਕਰਵਾਈਆਂ ਗਈਆਂ ਹਨ।

ਡਿਪਟੀ ਕਮਿਸ਼ਨਰ ਨੇ ਦੱਸਿਆ ਕਿ ਇਸੇ ਤਰ੍ਹਾਂ ਮਾਲ ਵਿਭਾਗ ਦੀਆਂ ਜੋ 5 ਸੇਵਾਵਾਂ ਹੁਣ ਸੇਵਾ ਕੇਂਦਰਾਂ ਰਾਹੀਂ ਮਿਲਣਗੀਆਂ, ਉਨ੍ਹਾਂ ਵਿੱਚ ਵਿਰਾਸਤ ਜਾਂ ਰਜਿਸਟਰਡ ਡੀਡ ਦੇ ਆਧਾਰ ‘ਤੇ ਇੰਤਕਾਲ ਲਈ ਅਰਜ਼ੀ, ਅਦਾਲਤੀ ਹੁਕਮ, ਬੈਂਕ ਗਿਰਵੀ ਜਾਂ ਕਰਜ਼ਾ ਮਾਫੀ ਆਦਿ ਨਾਲ ਸੰਬੰਧਿਤ ਰਪਟਾਂ ਦੇ ਦਰਜ ਲਈ ਅਰਜ਼ੀ, ਫ਼ਰਦ ਵਿੱਚ ਸੋਧ ਲਈ ਅਰਜ਼ੀ ਅਤੇ ਡਿਜੀਟਲ ਹਸਤਾਖਰਤ ਫ਼ਰਦ ਦੀ ਪ੍ਰਾਪਤੀ ਲਈ ਅਰਜ਼ੀ ਆਦਿ ਸ਼ਾਮਲ ਹਨ।

ਡਿਪਟੀ ਕਮਿਸ਼ਨਰ ਨੇ ਇਹ ਵੀ ਦੱਸਿਆ ਕਿ ਜੇਕਰ ਕੋਈ ਨਾਗਰਿਕ ਕਿਸੇ ਕਾਰਨ ਕਰਕੇ ਸੇਵਾ ਕੇਂਦਰ ਨਹੀਂ ਜਾ ਸਕਦਾ, ਤਾਂ ਉਹ ਪੰਜਾਬ ਸਰਕਾਰ ਵੱਲੋਂ ਸ਼ੁਰੂ ਕੀਤੀ ਗਈ ਡੋਰਸਟੈਪ ਡਿਲੀਵਰੀ ਸਕੀਮ ਦੇ ਜ਼ਰੀਏ ਇਹ ਸੇਵਾਵਾਂ ਆਪਣੇ ਘਰ ਬੈਠੇ ਵੀ ਪ੍ਰਾਪਤ ਕਰ ਸਕਦਾ ਹੈ। ਇਸ ਲਈ ਨਾਗਰਿਕ ਸਿਰਫ਼ 1076 ਨੰਬਰ ‘ਤੇ ਕਾਲ ਕਰਕੇ ਇਹ ਸੇਵਾ ਆਪਣੇ ਪਤੇ ‘ਤੇ ਮੰਗਵਾ ਸਕਦੇ ਹਨ।

ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਸਰਕਾਰੀ ਸੇਵਾਵਾਂ ਦੀ ਇਸ ਨਵੀਂ ਸਹੂਲਤ ਦਾ ਵਧੇਰੇ ਤੋਂ ਵਧੇਰੇ ਲਾਭ ਲੈਣ ਅਤੇ ਸਰਕਾਰੀ ਸੇਵਾਵਾਂ ਆਸਾਨ, ਪਾਰਦਰਸ਼ੀ ਅਤੇ ਸਮਾਂਬੱਧ ਤਰੀਕੇ ਨਾਲ ਹਾਸਲ ਕਰਨ।