ਦੁਨੀਆ ਭਰ ਵਿੱਚ ਸਿਆਸੀ ਹਲਚਲ  ਸਿਰਫ 3 ਦਿਨਾਂ ਅੰਦਰ ਜਪਾਨ, ਫਰਾਂਸ ਅਤੇ ਨੇਪਾਲ ਦੇ ਪ੍ਰਧਾਨ ਮੰਤਰੀਆਂ ਨੇ ਅਪਣਾ ਅਹੁਦਾ ਛੱਡ ਦਿੱਤਾ

ਦੁਨੀਆ ਭਰ ਵਿੱਚ ਸਿਆਸੀ ਹਲਚਲ  ਸਿਰਫ 3 ਦਿਨਾਂ ਅੰਦਰ ਜਪਾਨ, ਫਰਾਂਸ ਅਤੇ ਨੇਪਾਲ ਦੇ ਪ੍ਰਧਾਨ ਮੰਤਰੀਆਂ ਨੇ ਅਪਣਾ ਅਹੁਦਾ ਛੱਡ ਦਿੱਤਾ

ਇੰਟਰਨੈਸ਼ਨਲ ਡੈਸਕ- ਦੁਨੀਆ ਭਰ ਵਿੱਚ ਸਿਆਸੀ ਹਲਚਲ ਦਾ ਮਾਹੌਲ ਬਣਿਆ ਹੋਇਆ ਹੈ। ਸਿਰਫ 3 ਦਿਨਾਂ ਅੰਦਰ ਜਪਾਨ, ਫਰਾਂਸ ਅਤੇ ਨੇਪਾਲ ਦੇ ਪ੍ਰਧਾਨ ਮੰਤਰੀਆਂ ਨੇ ਅਪਣਾ ਅਹੁਦਾ ਛੱਡ ਦਿੱਤਾ। 7 ਸਤੰਬਰ ਨੂੰ ਜਪਾਨ ਦੇ ਪ੍ਰਧਾਨ ਮੰਤਰੀ ਸ਼ਿਗੇਰੂ ਇਸ਼ੀਬਾ ਨੇ ਅਸਤੀਫਾ ਦਿੱਤਾ, 8 ਸਤੰਬਰ ਨੂੰ ਫਰਾਂਸ ਦੇ ਪ੍ਰਧਾਨ ਮੰਤਰੀ ਫਰਾਂਸਵਾ ਬਾਇਰੂ ਨੇ ਅਹੁਦਾ ਤਿਆਗ ਦਿੱਤਾ ਅਤੇ 9 ਸਤੰਬਰ ਨੂੰ ਨੇਪਾਲ ਦੇ ਕੇਪੀ ਸ਼ਰਮਾ ਓਲੀ ਨੂੰ ਅਹੁਦਾ ਛੱਡਣਾ ਪਿਆ।

ਜਪਾਨ ਵਿੱਚ ਸਿਆਸੀ ਦਬਾਅ ਕਾਰਨ ਅਸਤੀਫ਼ਾ

ਜਪਾਨ ਦੇ ਪੀ.ਐੱਮ. ਇਸ਼ੀਬਾ ਨੂੰ ਹਾਲ ਹੀ ‘ਚ ਹੋਈਆਂ ਸੰਸਦ (ਹਾਊਸ ਆਫ ਕਾਉਂਸਲਰਜ਼) ਦੀਆਂ ਚੋਣਾਂ ‘ਚ ਹਾਰ ਮਿਲੀ ਸੀ। ਉਨ੍ਹਾਂ ਦੀ ਗਠਜੋੜ ਸਰਕਾਰ ਸਿਰਫ 75 ਸੀਟਾਂ ਹੀ ਜਿੱਤ ਸਕੀ। ਇਸ ਦੇ ਨਾਲ ਹੀ ਪਾਰਟੀ ਦੇ ਅੰਦਰੋਂ ਉਨ੍ਹਾਂ ਵਿਰੁੱਧ ਵਿਰੋਧ ਵਧਣ ਲੱਗਾ। ਇਸ ਦਬਾਅ ਹੇਠ ਇਸ਼ੀਬਾ ਨੇ 7 ਸਤੰਬਰ ਨੂੰ ਅਸਤੀਫਾ ਦੇ ਦਿੱਤਾ।

ਫਰਾਂਸ ਵਿੱਚ ਬੇਭਰੋਸਗੀ ਮਤੇ ਕਾਰਨ ਅਹੁਦੇ ਤੋਂ ਹਟਾਏ ਗਏ

ਫਰਾਂਸ ਦੇ ਪ੍ਰਧਾਨ ਮੰਤਰੀ ਫਰਾਂਸਵਾ ਬਾਇਰੂ ਨੂੰ ਸੰਸਦ ਵਿੱਚ ਵਿਸ਼ਵਾਸ ਮਤ ਨਹੀਂ ਮਿਲਿਆ। ਉਨ੍ਹਾਂ ਦੇ ਹੱਕ ਵਿੱਚ 194 ਅਤੇ ਵਿਰੋਧ ਵਿੱਚ 364 ਵੋਟਾਂ ਪਈਆਂ। ਇਹ ਰਾਸ਼ਟਰਪਤੀ ਮੈਕਰੋਂ ਲਈ ਚੌਥੀ ਵਾਰੀ ਹੋਵੇਗਾ ਜਦੋਂ ਉਹ ਨਵਾਂ ਪ੍ਰਧਾਨ ਮੰਤਰੀ ਚੁਣਣਗੇ। ਬਾਇਰੂ ਨੇ ਅਪੀਲ ਕੀਤੀ ਸੀ ਕਿ ਦੇਸ਼ ਦੇ ਵਧਦੇ ਕਰਜ਼ੇ ਨੂੰ ਰੋਕਣਾ ਲਾਜ਼ਮੀ ਹੈ, ਪਰ ਉਹ ਵਿਸ਼ਵਾਸ ਮਤ ਨਹੀਂ ਜਿੱਤ ਸਕੇ।

ਨੇਪਾਲ ਵਿੱਚ Gen Z ਦੇ ਰੋਸ ਨੇ ਓਲੀ ਨੂੰ ਕੀਤਾ ਮਜ਼ਬੂਰ

ਨੇਪਾਲ ਵਿੱਚ Gen Z ਵੱਲੋਂ ਸੋਸ਼ਲ ਮੀਡੀਆ ‘ਤੇ ਪਾਬੰਦੀ ਦੇ ਵਿਰੋਧ ‘ਚ ਹੋਏ ਹਿੰਸਕ ਪ੍ਰਦਰਸ਼ਨਾਂ ਨੇ ਹਾਲਾਤ ਬੇਕਾਬੂ ਕਰ ਦਿੱਤੇ। ਕਾਠਮਾਂਡੂ ਸਣੇ ਕਈ ਥਾਵਾਂ ‘ਤੇ ਸਰਕਾਰੀ ਜਾਇਦਾਦਾਂ ਨੂੰ ਨੁਕਸਾਨ ਪਹੁੰਚਾਇਆ ਗਿਆ। ਇਥੋਂ ਤੱਕ ਕਿ ਸੰਸਦ ‘ਚ ਅੱਗ ਲਾ ਦਿੱਤੀ ਗਈ। ਇਸ ਹਾਲਾਤ ਕਾਰਨ ਪੀ.ਐੱਮ. ਓਲੀ ਨੇ ਅਸਤੀਫਾ ਦੇ ਦਿੱਤਾ। ਓਲੀ ਦੇ ਅਸਤੀਫੇ ਤੋਂ ਬਾਅਦ ਨੇਪਾਲ ਦੀ ਸੈਨਾ ਨੇ ਕਮਾਨ ਸੰਭਾਲ ਲਈ ਹੈ ਤੇ ਕਈ ਥਾਵਾਂ ‘ਤੇ ਕਰਫਿਊ ਲੱਗਾ ਦਿੱਤਾ ਗਿਆ ਹੈ।